Page 26 - MODUL BAHASA KADAZANDUSUN 2020

6357

SAMPEL 2

Boogian C
[Timpu di posuulon: 30 minit]
[15 marka]

Basao’ o teks id siriba om ponuat do iso pongintigasan kokomoi Tadon do Osiliu Liud Lumpadang. Ninaru
pongintigasan nopo nga au kolobi do 120 patod boros. Milo ko nogi momoguno boros sondii nga au
popoundaliu di rati do teks.

Liud lumpadang nopo nga liud di monigowo tu au i piimanan do osiliu. Sundung do oruhai rasam nga
sikog ii do olumpadangan. Asaru do oontok o pogun dati do liud lumpadang. Koligogon o liud lumpadang
tu kapanahak ogumu kobolingkaangan om korutumon. Mantad dii, minog do iloon tokou tadon di kosubu
osiliu kaantakan liud lumpadang mooi do kaalai om koinsodu tokou mantad do kobolingkaangan dii.
Kinapamansayan do parit di au olomus o koluyungon nopo nga iso mantad tadon kaantakan do liud
lumpadang. Parit di oribau, okoro om au orinantai kaantob do koluuluyungon do waig. Oruhangan po
kawagu do koyuuyuon do mogiigion di orohian sangkataaman do rinomos gisom do osonsong o parit. Soira
do rumasam, waig au kotilombus do koluyung hilo id bawang toi ko’ rahat om iri koposiliu liud lumpadang
id kinoyonon di ongosiriba, loolobi no id kawalayan om kakadayan.

Panagadan do puun id talun nga tadon nogi do liud lumpadang. Oponsol o puun montok papasarabak
do waig id tana. Nung oingkurian o susuumuni, waig do rasam di asapou tumilombus koluyung id bawang.
Bawang di nongkosimban miagal do noingkaraan tu nokohompit id pomorunan kinoyonon, nokoundaliu
koluyungon, nookoribau om suusuai po nga iso nogi tadon do osiliu liud lumpadang. Puun di nangatagad
osiliu nogi do kumpar i kaantob koluyungon do liud bawang. Ahal diti kasabi nogi osiliu do liud lumpadang.

Sumusuhut, nokoribau o bawang tu nasanadan do rana. Ontok rumasam do asapou, ologod o waig do
lumuyung kaanu mongikis om kopiang nogi do tana di awayaan. Maid-laid nga akapal no tana di nakananad
gisom do oribau o bawang. Suai ko mantad dii, pataaman do rinomos om kakamot niada mantad kilang-
kilang nga kounsub nogi do oinribahan rinalom do bawang om aantaban nogi waig do lumuyung. Soira
rumasam, waig bawang lumabai id katanaan om osiliu no liud lumpadang.

Koburuon popokito kinoingkawason do ekonomi mogiigion om nogi pogun. Koburuon kopohompit
do pamansayan lobi ogumu o tionon pomuwalayan, kinoyonon pomorunan, kakamot infrastruktur om
suusuai po. Sundung do ogumu kounalan aanu mantad kinoingkawason ekonomi nga iri kaanu nogi
koporikot do kobolingkaangan nung au atamangan om atampasi o sandad posorili. Ontok rumasam, okuri
o kinoyonon di milo sarabakon do waig tu notobpin do simen, tar, konkrit om suusuai po. Mantad dii, oruhai
do oponu o parit om lumabai nogi id kakadayan om kawalayan. Ahal diti nga iso nogi mantad sabab do
osiliu liud lumpadang soira rumasam loolobi id kakadayan.

Id kolimpupuson, rasam om liud nopo nga koyuuyuon tawan di poinsandad mantad tu ii kaanu nogi
manahak ogumu kounalan kumaa mamaamasi. Sundung po do ingkaa, nung aiso laang do powonsoyon
montok manamong kosunsudon do sandad posorili om au nogi mamalan do pomorunan tumanud do
kooturan, nga mompus-ompus tokou kotoguang do liud lumpadang loolobi soira orikot timpu marasam.

26