Page 27 - MODUL BAHASA KADAZANDUSUN 2020

6357

SAMPEL 3

Boogian C
[Timpu di posuulon: 30 minit]
[15 marka]

Basao’ o teks id siriba om ponuat do iso pongintigasan kokomoi Laang Poposuni Sunduan Mupus do
Pogun. Ninaru pongintigasan nopo nga au kolobi do 120 patod boros. Milo ko nogi momoguno boros
sondii nga au popoundaliu di rati do teks.

Ontok timpu moden diti, kogumuan tulun aanagan do minsoosondi. Sontotos-totos nopo monimung
do kotos montok popoingkawas kopooposion diolo. Okuri nodi kohondom kokomoi koponsolon do
popogirot sunduan mupus pogun. Gisom do haro i au no kohondom roiton do loyou Negaraku, au kosorou
nuludan prinsip Rukun Negara om au ngawi popokili bendera soira orikot tulan kagabasan. Mantad no dilo,
laang montok poposuni sunduan mupus do pogun minog do pogiroton kawagu mooi do kaanu tokou mion
miampai oulud, osompuru om lobi kitonggungan montok do pogun.

Ogumu o laang di milo poindalanon montok poposuni sundun mupus do pogun. Laang koiso nopo
nga poposuni kopurimanan mupus do pogun mantad di tokoro po om loolobi no id pialatan tangaanak sikul.
Oponsol o mongingia popoobi timpu om mamalan do abaabayan montok popokito kumaa tangaanak
songkuro ginayo kinolubukon dii susumangod om boyoon ngawi pogun gisom do nakaanu pogun do
kagabasan om kosimbayanan. Unsubon o tangaanak poposolimbou imatu sondii maya abaabayan miagal
do abaabayan mamaramai Tadau Kagabasan, momoloyou loyou patriotik, monoodo his, momolukis om
suusuai po.

Sumusuhut, molohing om mogiigion di lobi otuo sumiliu poomitanan tosonong kumaa tangaanak.
Tangaanak tongokoro minsingilo maya koyuuyuo id posorili diolo. Sabaagi poomitanan, nung tikid orikot
tulan kagabasan popokili o molohing do bendera om osiliu iri koubasanan do tangaanak gisom do kagayo.
Milo nogi molohing do mangangat do tangaanak mooi pimpanau id kinoyoonon di kisajara om miampai
dii poposusui nunu ngawi nawayaan do komolohingan di pogulu gisom nakalantoi do kagabasan.

Suai ko mantad dilo, puru di kitonggungan miagal ko porinta, kotinanan minsoosondi, Non-
Government Organisation (NGO) om suusuai po minong popoindalan do kempen montok poposuni
sunduan mupus do pogun. Kempen diti milo poindalanon miampai papaharo piboian di lobi agayo miagal
do piboian kolumison om koburuon kampung, piboian koir mantad tinimungan mogisuusuai tinaru,
papaharo Walai Poingukab Kebangsaan om suusuai po. Media massa miagal do stesen radio, surat abar om
televisyen kitingunggan montok poposolimbou kokomoi koponsolon papatanom sunduan mupus do pogun
om monokodung toinsanan di abaabayan montok popogirot pisompuruan daasom pomoromitan tulan
kagabasan.
Tikid tulun, oponsol nogi momurimon kopio do tongungan sondii kumaa pogun. Sabaagi mogiigion,
kasaasari daa mongunsikou om monongkotoluod kumaa minamangun tu noonuan do kinoyonon om pogun
di osimbayan. Momurimon nogi kopio songkuro ginayo kinolubukon di boyoon-boyoon do pogun di
pogulu gisom nokotungkus tokou iso pogun di otoronong. Oponsol nogi do kopuriman tokou oondos om
oupus do pogun sondii tu hiti no tana kinosusuon, kinogoyoon om kinoyonon do paganakan om koworisan.

Id kolimpupuson, oponsol kopio do haro sunduan mupus do pogun id pialatan pointikid do mogiigion.
Ahal diti oponsol mooi do osiliu tokou mogiigion di kiguna kumaa tinan, paganakan, ugama, tinaru om
pogun sondii. Tulun di kiimatu kasaasari mingoos popoburu do koposion sondii om paganakan. Mantad
dii, kaino ngawi mogisoosokodung papatanom sunduan mupus do pogun montok kowosian toinsanan.

27