Page 28 - MODUL BAHASA KADAZANDUSUN 2020

6357

SAMPEL 4

Boogian C
[Timpu di posuulon: 30 minit]
[15 marka]

Basao’ o teks id siriba om ponuat do iso pongintigasan kokomoi do Kounalan Papasarabak Disiplin
Kumaa Tangaanak Sikul. Ninaru pongintigasan nopo nga au kolobi do 120 patod boros. Milo ko nogi
momoguno boros sondii nga au popoundaliu di rati do teks.

Oponsol kopio papasarabak disiplin kumaa tangaanak sikul. Nung apatong i tangaanak sikul do
kooturan sikul, odisiplin no yolo. Disiplin nopo nga iso ralan do magantob kowoowoyoo’ sosongulun mooi
do au momonsoi ahal tangaraat. Tangaanak sikul nopo di haro disiplin bobos tosonong popokito
kowoowoyoon songulun i kagampot kalantayon id suang do koposion sondii. Kooturan di pinatatap kosiliu’
sabaagi iso kakamot i magantob tangaanak sikul mantad momonsoi ahal tangaraat om kopogowit rutum
montok tinan sondii.
Ogumu kounalan papasarabak disiplin kumaa tangaanak sikul. Wokon nopo nga, kopoinsodu
tangaanak sikul mantad kobolingkaangan disiplin loolobi id suang kalas daamot poimpanau o pambalajaran
om pongia’an. Nung kidisiplin o tangaanak sikul, katanud yolo kooturan sikul miagal ko’ au mingangau,
miodu om monigup. Ahal diti kopoinsodu diolo do onuan danda om demerit. Mantad dii, otorodok nogi
yolo do balajal id suang kalas.
Tangaanak sikul i kidisiplin, koilo nogi momonsoi jadual balajar sondii. Mantad jadual di nowonsoi,
mingoos nondo yolo do balajar tumanud jadual sondii miagal ko’ tumingkod do balajar nung korikot timpu
do balajar mato balajalan suai. Koilo nogi yolo do manahak boros ponginsasamod montok tinan sondii om
tambalut mooi do minggisom do balajar ko’ lumansan nopo boros molohing om mongingia’.
Kooturan sikul ii papatatap timpu korikatan id sikul kitudu do monuduk tangaanak sikul mamalan
timpu. Tangaanak sikul nopo di katanud kooturan diri nga komoyon koilo do mamalan timpu montok tinan
sondii. Suai ko’ ilo, kosiliu nogi sabaagi songulun i mamagatang do timpu. Nung mamagatang i tangaanak
do timpu, kaanu nogi yolo do momiduo timpu balajar om mamain. Kopogirot nogi do iman-imanon diolo
maya do orubatan timpu nung au’ mingoos do balajar.
Kounaalan suai do disiplin nopo nga kapasarabak woyo toulud kumaa tangaanak sikul miagal ko’
mamantang tongomongingia’ om molohing sondii. Mantad dii, sabaagi tangaanak sikul oporlu kopio do
posotolon woyo toulud kumaa tangaanak sikul maya disiplin mooi do kopurimanan yolo do winagat
tonggungan mongingia’ manahak toilaan.
Nung kidisiplin i tangaanak sikul, aanangan nogi i tongomomongia’ kumaa diolo om asanang
mogihum do pangawas om luguan kalas. Oponsol kopio o ponontudukan disiplin sabagai iso pambalajaran
montok do sumiliu’ luguan di kitonggungan om kopoburu pogun ontok timpu dumontol.

28